Samskipti við aðra lýsa þér best

 Í dag eins og aðra daga er líklegt að þú notir ekki nema um hálftíma til að TALA við annað fólk.  Mestur tími dagsins fer í önnur SAMSKIPTI.  Þú brosir, yppir öxlum, lyftir augabrúnunum eða notar líkamann á einhvern hátt til tjáningar. Þessar líkamshreyfingar segja sögu í því samhengi sem þær koma fram. Talað orð er aðeins lítill hluti af samskiptum okkar því við tjáum okkur að mestu með orðlausum samskiptum.  Með þeim gefur þú til kynna álit þitt á öðrum s.s samþykki, jákvæðni, velþóknun, fyrirlitningu og niðurlægingu.  Með þessum samskiptum “segir” þú einnig öðrum hvaða persónu þú hefur að geyma, jafnvel augljósar en þig grunar.

 Í orðlausum samskiptum felast þættir eins og notkun tíma og rúms, fjarlægð milli einstaklinga, litaval, klæðnaður, göngulag, hvernig fólk stendur, situr, niðurröðun húsgagna, o.fl. o.fl. segja má að upptalningin sé nánast óendaleg.

 Orðlaus samskipti segja oft meira en nokkur orð jafnvel þó þau séu oft lítt áberandi, jafnvel svo, að við tökum varla eftir því að við erum að gefa alls konar merki án orða.  En hvað kemur þetta starfinu við? Vegna eðlis orðlausra samskipta þá skiptir miklu máli að gera sér góða grein fyrir þýðingu þess.

 Næmni fyrir orðlausum samskiptum gerir fólk kleift að skilja aðra betur og gefur meiri möguleika á að hafa þau áhrif í samskiptum sem fólk óskar eftir. Markviss jákvæð þjálfun á þessu sviði getur aukið jákvætt andrúmsloft á vinnustað, sem síðan skilar sér í aukinni vellíðan og betri þjónustu.

 Miklu máli skiptir einnig að vera næmur á eigin orðlausu samskipti og þá hvaða viðbrögð þau vekja hjá öðrum. Þessi næmni ræður því hvernig fólk bregst við því sem við segjum og hvaða áhrif við höfum sem einstaklingar.

Dæmi um orðlaus samskipti:

Tími – niðurröðun húsgagna – umhverfi – fatnaður- líkamslykt – nálægð – staða – hendur/fætur – andlitshreyfingar – augntillit – þögn – röddin

Bjarni Ingvarsson vinnusálfræðingur 1987

Vilborg G. Guðnadóttir tók saman 1996