Opin tjáskipti

Opin tjáskipti styrkja tengsl þín við aðra

Þrátt fyrir að því fylgi viss áhætta að vera hreinskilin, er ávinningurinn öllu meiri, bæði fyrir þig og fyrir samskipti þín við aðra.

Ávinningurinn felst í;

Að þekkja sjálfan sig betur.  Þegar þú opnar þig fyrir öðrum, ertu á sama tíma að tjá þig gagnvart sjálfum þér, að ná til tilfinninga þinna og hugsanna. Þú verður meðvitaðri um sjálfan þig.

Að kunna betur við sjálfan sig. Þú ert sáttari við sjálfan þig sem manneskju, foreldri, maka og samstarfsmann þegar þú ert opin og hreinskilin, þegar þú lætur í ljós hver þú ert, hvað þú hugsar og hvað þér finnst.

Að aðrir skilja þig betur. Opin tjáskipti af þinni hálfu verða til að aðrir skilja þig á réttan hátt. Þeir sem standa þér næst og samstarfsmenn kynnast því sem skiptir þig máli, en vaða ekki um í villu hvað það snertir.  Spenna og óvissa heyrir fortíðinni til og í staðinn komin örugg vitneskja um hver þú ert.

Að örva aðra til að nota opin tjáskipti. Hreinskilni þín og einlægni mun óhjákvæmilega hvetja til þess sama frá öðrum í kringum þig. Opin tjáskipti eru mjög smitandi. Þegar þú ferð á undan með góðu fordæmi, læra aðrir af þér. Þetta styrkir vanalega böndin. Það dregur úr firringu, spennu og afskiptaleysi og í stað kemur gagnkvæmur skilningur og umhyggja.

Að fyrirbyggja vandamál. Hinir geta betur komið til móts við þarfir þínar ef þeim er ljóst hverjar þær eru. Þar með dregur stórlega úr líkunum á að þú lendir í ágreiningi við aðra af þeirri ástæðu að þeir vita ekki hvað þú vilt. Þar sem eru opin tjáskipti, hefur spenna, andúð og þögul þjáning enga möguleika á að þrífast.

Í hjartans einlægni. Hugo Þórisson, sálfræðingur.