Innlent | mbl.is | 18.3.2005 | 14:00

Dæmdur í 16 ára fangelsi fyrir morðið á Sri Rhamawati

Héraðsdómur Reykjavíkur dæmdi í dag Hákon Eydal í 16 ára fangelsi fyrir að verða Sri Rhamawati, barnsmóður sinni, að bana á heimili sínu í Reykjavík í fyrrasumar. Þá var Hákon dæmdur til að greiða börnum Sri samtals 21,8 milljónir króna í bætur. Hákon lýsti því yfir, þegar dómurinn var kveðinn upp, að hann muni áfrýja honum til Hæstaréttar.

Við réttarhöld játaði Hákon brotið en verjandi hans krafðist sýknu honum til handa við aðalmeðferð málsins á þeirri forsendu að hann hafi verið í miklu andlegu ójafnvægi vegna sambands síns við Sri. Var því haldið fram að Hákon hafi sætt slíkum misgerðum og ranglæti af hálfu Sri að geðwsmunir hans hafi verið með þeim hætti er hann framdi brotið að hann hafi ekki verið í sakhæfu ástandi.

Dómari segist ekki geta fallist á þetta sjónarmið enda styðji gögn málsins í engu þær ásakanir. Þá yrði ekki séð af skýrslum ákærða sjálfs frekar en öðrum sakargögnum að konan hafi misboðið ákærða þennan afdrifaríka morgun. Loks þætti útlistun Hákonar á hugarástandi sínu þegar hann framdi brotið vera mótsagnakennd og því ósannfærandi.

Dómarinn segir að atlaga Hákonar að Sri Rahmawati hafi verið heiftarleg og bersýnilegt að hann ætlaði sér að svipta hana lífi. Ekki þætti þó sannað að hann hafi ásett sér það fyrr en skömmu fyrir voðaverkið og yrði að byggja á þeim framburði hans að hann hafi ráðist á konuna eftir að þeim varð sundurorða.

Þá segir í dómi Héraðsdóms Reykjavíkur að Hákon hafi reynt að afmá öll merki um brot sitt og meðferð hans á líkinu hafi verið smánarleg. Einnig hafi komið fram hjá honum að hann hafi einsett sér að vera lögreglunni erfiður þótt hann vissi að upp um hann hlyti að komast. Hann hafi neitað sök framan af lögreglurannsókninni og reynt um skeið, eftir að hann játaði verknaðinn, að villa um fyrir lögreglu í leitinni að líkinu. Þá gæfi framganga hans við rannsókn málsins, þ. á m. undir geðrannsókninni, og skýrsla hans fyrir dómi til kynna að hann væri ekki mjög sakbitinn eftir verkið.

Hákon kvaðst viss um að hann hafi slegið konuna nokkrum sinnum með kúbeini þótt hann myndi ekki eftir því. Einnig viðurkenndi hann að hafa brugðið belti um háls hennar og hert að. Hann viðurkenndi einnig að hafa sett líkið í poka og komið því fyrir í hraungjótu í nágrenni Hafnarfjarðar.

Við þingfestingu málsins mótmælti Hákon ekki rúmlega 20 milljóna króna bótakröfum barna hinnar látnu.

Innlent | mbl.is | 4.3.2005 | 13:47

Játar fyrir dómi að hafa myrt Sri Rhamawati

Maður sem ákærður er fyrir að hafa ráðið Sri Rhamawati, barnsmóður sinni af asískum uppruna, bana á heimili sínu í Reykjavík í fyrrasumar játaði brotið er aðalmeðferð í málinu hófst í Héraðsdómi Reykjavíkur í morgun.

Maðurinn, Hákon Eydal, kvaðst viss um að hann hafi slegið konuna nokkrum sinnum með kúbeini þótt hann myndi ekki eftir því. Einnig viðurkenndi hann að hafa brugðið belti um háls hennar og hert að.

Hákon viðurkenndi einnig að hafa sett líkið í poka og komið því fyrir í hraungjótu í nágrenni Hafnarfjarðar. Hann sagðist iðrast gjörða sinna og talaði ítrekað um að hafa verið í sturlunarástandi, að því er fram kom í hádegisfréttum RÚV.

Hákon Eydal játaði einnig að hafa svipt Sri Rhamawati lífi hinn 4. júlí sl. í íbúð sinni við Stórholt í Reykjavík er málið var þingfest fyrir Héraðsdómi Reykjavíkur í byrjun janúar.

Viðurkenndi hann við það tækifæri að hafa barið Sri með kúbeini, þótt hann væri ekki viss um hversu mörg höggin hefðu verið og sömuleiðis kannaðist hann við að hafa vafið belti um háls hennar en hún lést af völdum kyrkingar.

Við þingfestinguna mótmælti Hákon ekki rúmlega 20 milljóna króna bótakröfum barna hinnar látnu í málinu. Ríkissaksóknari telur brot ákærða varða við 211. gr. almennra hegningarlaga sem kveður á um ævilangt fangelsi fyrir manndráp, þó ekki skemur en 16 ár.

Innlent | mbl.is | 2.9.2005 | 17:37

Brugðist verður harðar við heimilisofbeldi

Björn Bjarnason, dóms- og kirkjumálaráðherra, hefur ákveðið að fylgja fram tillögum refsiréttarnefndar um að breyta hegningarlögum, til að unnt verið að bregðast harðar við heimilisofbeldi. Kom þetta fram í ræðu ráðherrans í dag á norrænni ráðstefnu um baráttu gegn kynbundnu ofbeldi, sem haldin er hér á landi að frumkvæði Stígamóta.

Þá skýrði Björn frá því, að dómsmálaráðuneytið og refsiréttarnefnd hefðu fjallað um verklagsreglur ríkislögreglustjóra um heimilisofbeldi og væru þær nú komnar til fullnaðarafgreiðslu. Sagðist Björn gera sér góðar vonir um, að þessar reglur skiluðu góðum árangri og markvissum rannsóknum lögreglu á heimilisofbeldisverkum.

Fram kemur í tilkynningu að dómsmálaráðherra muni, á grundvelli álitsgerðar refsiréttarnefndar um heimilisofbeldi, leggja til á Alþingi að við almenn hegningarlög bætist sérstök refsiþyngingarástæða, þar sem náin tengsl geranda og brotaþola þykja hafa gert árásina grófari. Þá muni ráðherra leggja til að ákvæði 191 gr. almennra hegningarlaga verði gerð skýrari, meðal annars vegna ákvæða stjórnarskrár, sem krefjast þess, að refsiákvæði séu skýr, svo að þeim verði beitt.

„Ég hef ákveðið að gera báðar þessar tillögur að mínum og mun fela nefndinni að fara yfir þessa grein hegningarlaganna í því skyni, að skýra hana betur í ljósi refsiheimilda. Mér þykir, eins og áður er sagt, eðlilegt að litið verði sérstaklega til náinna tengsla geranda og brotaþola, og þannig sýni löggjafinn, og væntanlegar dómstólar í framhaldinu, að hann líti það sérstaklega alvarlegum augum, ef maður, karl eða kona, vinnur sínum nánustu mein. Með því er ekki aðeins unnið hið hefðbundna mein, sem hlýst af ofbeldinu, heldur einnig brugðist því trausti, sem hver maður vill geta borið til sinna nánustu,“ sagði Björn í ávarpi sínu.

Aðgerðaáætlun gegn heimilisofbeldi og kynferðislegu ofbeldi undirbúin

Ríkisstjórnin samþykkti í morgun, að tillögu félagsmálaráðherra og dóms- og kirkjumálaráðherra, að hafin verði skoðun á því með hvaða hætti megi standa að gerð og framkvæmd heildstæðrar aðgerðaáætlunar gegn heimilisofbeldi og kynferðislegu ofbeldi hér á landi.

Lagt er til að sjónum verði sérstaklega beint að börnum sem verða fórnarlömb kynferðislegs ofbeldis. Sérstaklega verði skoðað hvernig styrkja megi barnaverndaryfirvöld, félagsmálayfirvöld, skóla, heibrigðiskerfið, lögregluna og fleiri með það að markmiði að efla fræðslu og samhæfa vinnubrögð, verkferla og úrræði þessara aðila.

Samþykkt var að fela verkefnið samráðsnefnd félagsmálaráðherra, sem skipuð var þann 22. janúar 2003, og í eiga sæti fulltrúar félagsmálaráðuneytis, dómsmálaráðuneytis, heilbrigðis- og tryggingamálaráðuneytis, menntamálaráðuneytis og Sambands íslenskra sveitarfélaga. Nefndinni var upphaflega falið að fjalla um aðgerðir gegn ofbeldi gegn konum en mun nú auk upphaflegs verkefnis fjalla sérstaklega um þau verkefni sem getið er um í samþykkt ríkisstjórnarinnar frá í dag.

Þar var einnig ákveðið að sérstakur starfsmaður muni starfa tímabundið með samráðsnefndinni í fjóra mánuði frá 1. nóvember nk. til 28. febrúar 2006 til að vinna að þeim verkefnum, sem ekki hafa þegar verið sérstaklega falin öðrum, og skal samráðsnefndin að því loknu skila ríkisstjórninni tillögu að aðgerðaáætlun gegn heimilisofbeldi og kynferðislegu ofbeldi hér á landi. Aðgerðaáætlunin skal m.a. unnin í samvinnu við hagsmunaðila og frjáls félagasamtök. Áætlunin skal liggja fyrir til umfjöllunar í ríkisstjórn eigi síðar en 3. mars 2006.

Innlent | mbl.is | 18.11.2005 | 12:47

Frumvarp um aðgerðir gegn heimilisofbeldi kynnt

Frumvarp dóms- og kirkjumálaráðherra sem kveður á um aðgerðir gegn heimilisofbeldi var kynnt á ríkisstjórnarfundi í morgun. Í frumvarpinu er í fyrsta lagi lagt til að lögfest verði nýtt ákvæði í 70. gr. almennra hegningarlaga, þar sem verði að finna „refsiþyngingarástæðu þegar náin tengsl geranda og brotaþola þykja hafa aukið á grófleika verknaðar,“ samkvæmt upplýsingum frá dóms- og kirkjumálaráðuneyti.

Um yrði að ræða heimild til að hækka refsingu innan lögmæltra refsimarka viðkomandi refsiákvæðis. Ákvæði af þessu tagi sé „til þess fallið að beina sjónum dómara að nánum tengslum geranda og brotaþola þegar kemur að því að ákvarða refsingu fyrir brot á gildandi refsilögum,“ samkvæmt upplýsingum frá ráðuneytinu. Þannig þurfi dómari ávallt að leggja á það mat og rökstyðja í forsendum sínum hvort náin tengsl geranda og brotaþola hafi haft einhver áhrif við ákvörðun refsingar.

Er lagt til að ákvæði 1. mgr. 191. gr. almennra hegningarlaga verði fellt brott, þar sem telja megi að markmiðið að baki henni sé einkum að vernda friðhelgi og æru einstaklinga í samskiptum við aðra fjölskyldumeðlimi, og telur ráðuneytið að refsivernd ákvæðisins hafi ekki verið virk í réttarframkvæmd frá gildistöku laganna.